*** الهجر ***
عايز تهجر اهجر يا قلبي
شوف هتروح من قلبك فين
جايز ممكن تنسى شكلي
لكن قلبك كله حنين
لما يمر عليك الليل
بذكرى جميلة لحب متين
إزاي كنا نشوف القمر
ويسمع همس غرام عاشقين
يخجل نوره ويغيب حبه
ويقول والله دول دايبين
أشوف الفرحة راسمة خدودك
وأحضن طيفك جوه العين
تنام عيونك بين أحضاني
وتسكن قلبي بين ضلعين
تنسى الدنيا وكل قساها
وتحس أننا بالروح عايشين
زي طيور عاشقة للسما
نغني ونفرح واحنا هايمين
وقتها بس تشوف الندم
وتدوق مر فراق وأنين
وتبكي ذكرى حب هجرته
تتمنى تشوفه بس دقيقتين
وتعرف أنك بكل غباء
ضيعت بإيدك كنز ثمين
*************************
بقلم / مصطفى كرم
تعليقات
إرسال تعليق